Sah gimme ah wuk nah
Sh lookin’ ole but ah strong.
Never mind ah skinny sah,
Ah cud wuk like a beas’
Clean yard, shine car, cut grass,
Ah tekkin anything sah,
Yu see dis hand sah, it like stone,
Never mind it lookin maga.
Dis hand pelt cutlass
Like Sampson pelt the ass jaw,
Dis hand clear bush from Toco to town,
When tree see me dey does bawl
If dey cudda run, is a strait case
‘Cause I is de man with de Lightenin in me hand.
My blade does flash in de sun
Like fish against riverstone,
And when ah finish is me one standing
An’ all bush ley down quiet quiet
Yes sah, dis hand is a wukkin hand
Yuh lookin at me sah,
With me pants foot roll up,
An’ me mareno lookin holy, holy,
Never mind dat sah, look sah, look me hand
Tough like mangrove root,
Hard like iron cable,
Dis is ah hand sah, ah real hand ah wukkin hand,
Ah hand with ah past, ah present an’ ah future
Dis hand chuck banana, sah
Cut dem, drough dem, an stack dem
Under sun, under moon, an in de dark,
An when back cry out, an foot say stop
Dis hand still goin’ like ah champ
Ah stroke to de left, an ah stroke to de right
Dat was me, de man with de iron hand.
Don’t judge me by me size sah,
Ah lookin small ah know dat
But me hand sah, watch it
Dis hand have character,
Dis hand throw net like feather,
An when dis hand pull back sah,
Fish in any weather.
Ah catch dem, cut
dem, clean dem
Ah couldn’t afford to eat them.
Yes sah, dis hand sah
It throw stone, pelt rock
Wash in river, an cook on fire
It get cut, bruise, burn, an break
Dis hand sah grow up strong.
It help police pull hose
When man house start burnin down,
It tired pullin car out ah ditch,
It break fight under plenty strain
But is a wukkin hand sah
And dis hand sah, have touch
Crack and egg, an pick a flower,
But dis hand is an honest hand sah
Dis hand pick up two hundred dolla’
Lying dey pon de street
An dis hand send it straight to de station
Yes sah, dis hand make headline,
De paper call me de ‘honest hand’
Wha yu say sah?
Yu eh have no wuk
Yu making joke sah
How yu mean yu eh have wuk?
A rich lookin fella like yu,
Stand up in front yu big house
An dress up as if is weddin yu goin to.
Ah know is joke yu jokin sah.
Wah dis sah? Dis is not yu house?
Yu just stan uo here waitin on taxi?
But look me crosses with dis niggerman,
Ah stan’ up here only wasting me time with he
Poor man like me, with arthritis,
Me dam hand near fallin off
An he can’t even sponsor ah cup ah coffee
Only posing up infront de people place ah have a good
mind arrest yu.
Look man, move out ah me sight yu hear?
Before ah leggo de hand on yu.
Well, yes.
No comments:
Post a Comment